Yashash joyi va turgan joyi bo‘yicha ro‘yxatdan o‘tkazish tartibi belgilandi

"O‘zbekiston Respublikasi fuqarolarini, chet el fuqarolarini hamda fuqaroligi bo‘lmagan shaxslarni yashash joyi va turgan joyi bo‘yicha ro‘yxatdan o‘tkazish to‘g‘risida" Qonun qabul qilindi. Qonunga qator tushunchalar kiritilmoqda, xususan yashash joyi bo‘yicha ro‘yxatdan o‘tkazish — O‘zbekiston Respublikasi fuqarosining, shuningdek O‘zbekiston Respublikasida doimiy yashovchi chet el fuqarosining yoki fuqaroligi bo‘lmagan shaxsning yashash joyi to‘g‘risidagi ma’lumotlarni belgilangan tartibda qayd etilishi, harakatlanish hujjatlari — milliy pasportlar, shuningdek ularning o‘rnini bosuvchi boshqa hujjatlar bo‘lib, ular asosida chet el fuqarolari va fuqaroligi bo‘lmagan shaxslar O‘zbekiston Respublikasining qonunchiligiga hamda xalqaro shartnomalariga muvofiq O‘zbekiston Respublikasi hududiga kirish (undan chiqish) va uning hududida bo‘lish huquqiga ega bo‘lishi belgilanmoqda. Yashash joyi va turgan joy bo‘yicha ro‘yxatdan o‘tish zarur bo‘lgan muddatlar O'zbekistonda istiqomat qiluvchi shaxslar (fuqarolar, chet el fuqarolari va fuqaroligi bo'lmagan shaxslar) 10 ish kuni, O'zbekistonga kirib kelgan chet el fuqarolari va fuqaroligi bo'lmagan shaxslar 3 ish kuni.
Quyidagilar O‘zbekiston Respublikasi bo‘ylab erkin harakatlanish, turar va yashash joyini tanlash huquqi cheklangan hududlar hisoblanadi:
chegara zonasi;
yopiq harbiy shaharchalar;
yopiq ma’muriy-hududiy tuzilmalar;
tabiiy hamda texnogen xususiyatli favqulodda vaziyatlar ro‘y bergan zonalarda, shuningdek fuqarolarning hayoti, sog‘lig‘i va xavfsizligiga tahdid soladigan boshqa joylar;
yuqumli kasalliklarning hamda yuqumli bo‘lmagan ommaviy kasalliklarning tarqalishi, odamlarning zaharlanish xavfi mavjud bo‘lganligi munosabati bilan aholining yashashi hamda xo‘jalik faoliyati uchun alohida shartlar va rejimlar joriy etilgan ayrim hududlar hamda aholi punktlari;
o‘ta muhim va toifalangan obyektlar;
favqulodda yoki harbiy holat e’lon qilingan hududlar.
Vakolatli organ - Ichki ishlar vazirligi.