O‘zbekistonda faktoring xizmatlari bozorini rivojlantirishga qaratilgan qonun qabul qilindi

2025-yil 17-aprel kuni "Tadbirkorlik subyektlarini moliyaviy qo‘llab-quvvatlash tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida"gi O‘zbekiston Respublikasining Qonuni imzolandi. Qonun pul talabnomasidan boshqa shaxs foydasiga voz kechish bo‘yicha taqiqni buzganlik uchun javobgarlikni bekor qilish, mijozning kontragenti norezident bo‘lganda faktoring operatsiyalarini xorijiy valyutada amalga oshirishga ruxsat berish, pul talabnomasidan voz kechish to‘g‘risidagi xabarnomalarni garov reyestrida ro‘yxatga olishni yo‘lga qo‘yish ko‘zda tutilgan. Shu bilan birga, loyihada tadbirkorlik subyektlariga faktoring xizmati ko‘rsatishga ixtisoslashgan faktoring tashkilotlarini tashkil etish, Faktoring tashkiloti faoliyatini nobank kredit tashkiloti sifatida reyestrga kiritish va uning faoliyatini Markaziy bank tomonidan tartibga solish belgilangan.
Qonun tadbirkorlik subyektlari tomonidan moliyaviy xizmatlardan foydalanish imkoniyatini kengaytirishga va biznesni moliyalashtirishning samarali vositalarini joriy etishga, shu jumladan pul talabnomasidan boshqa shaxs foydasiga voz kechish evaziga moliyalash (faktoring) bo‘yicha zamonaviy qonunchilik bazasini yaratishga, faktoring operatsiyalarini rivojlantirishga va tatbiq etishga xizmat qiladi.